Poetry Map of Scotland: poem no. 384

Topplin’ the Mannie /on Ben Bhraggie

Paddit benorth o' Inverness, Eastle seaboard bound
Spy the Duke on Bhaggie Ben askew o'er steenie grund
Gazing athourt to aither sea as far as teary e’e can see
Blaudit the day, bane on the brae
Nae dint o shame he'll e'er dree 

The vaunty Laird a clan chief ance wud fend ilka ane o crofters
But deil he dic'd at Westminster begowk'd his sons an dochters
A Judas kiss to hielan clan, Macbeth is ev'ry noble man
knife-stickit Scots the back o' Scots, sauld the flock an left the shotts
Man owerthraw'd his countryman 

Hag burns on shame-reek'd sypit land, bronze crottal haltit growin
Ling pit-past a waving hand, gurgle-burnie stoppit flowin
Daeless mist blurs o'er the moor, tears blear o'er wretch'd poor
Tae fleet or burn tae crulge or turn
Foul fa' wha sent the fog tae smoor 

Twa centuries on, the sheep lang-gane replaced wi’ moor-groosed leisure
The ghillie's world itsel replaced wi’ gowfin Preppers pleisur
The real Hielands squat in repose o’ dreichit fachie bungalows
Drachie morn, dark'nin dawn
Scots wha hae wealth as their foes 

The Laird cannae affard to bide when billionaires come leukin
An juist as those afore him died the Laird gets his ain hidin
Naebody drank the merrie foy o' the Chieftain's treason'd boy
Like a curling stane creepit, sloomit an sleekit
The malafousterin o' the hoi polloi 

An sae the tattie howkers howk aboot the Mannie’s rimie feet
An Mannie shoutit ‘Keep the heid! I wud cantily lie and sleep
But what good is to topple me, caw canny fae ye plan's ajee
Fae efter me, there's a queue tae feed the baggity beastie's mou
Wi pow'r, pow'r wrestl'd aff a ye’

As dries the scart by outstretched wing the Duke still casts a shaidae
but whither land or o' that ilk prescribit tha' they awe ye
They awe by awning a' ye ken, they awe ye women an ye men
It gars ye grue tae see it true
Tha’ Clearances will ne'er en' 

Jilly O'Brien

View our full map of Scotland in Poems as it grows »

For instructions on how to submit your own poems, click here

All poems from our Poetry Map of Scotland  are subject to copyright and should not be reproduced otherwise without the poet's permission.