Skip to content

StAnza 2027 · 12-14 March · St Andrews

Poetry Map of Scotland · poem no. 427

Polmaddy

There was a pub here ca’d Netherward makit square tae the lift wi stanes.
Its welcomin wa’s waur yince an oasis fur drovers alang the pack road frae ither pairts.
Ferm toun folk yees’t tae birl oot o it fu o ale, awa fae the jiggin o fiddles.
There’s no a hail lot o Polmaddy left. The birkie lairds turnt the toun tae nowt, an yees’t its stanes tae mak wa’s fur their  ferms.
Thaim stiff-neckit cauld buggers fill’t them fu o sheep.
While weemin and weans wailed,
thur  pitiless miserable nobles drove honest men ower the ocean frae  land ne’er since till’t.
Umpteen faimilies waur uprooted tae look fur sanctuary in Canada, their hearths an hames swallow’t bae Gallowa mossland.
Polmaddy had its ain mill an monie a biggin an byre, whaes ruined stanes’d tell a hail lot o stories.
Twas the miller’s wife that hid Robert the Bruce when he was a fugitive frae hill tae hill.
She hid him frae the sodgers amang her grain until the heat was aff,
an he was able tae re-group fur his victory against the Englisch at Glentrool.
Later, efter he was croon’t king o broad Scotland, he took the mill an gie’d it tae yon Samaritan wummin.
There’s jeest the banes o it left staunin: an the greedy gentry should hae thocht black burnin shame o theirsels.

Where this poem is set

See it on the Poetry Map

Back to the Poetry Map